ТАЪРИХИ КАФЕДРАИ АУДИТ ВА РЕВИЗИЯ

Тибқи моддаи 18 Қонуни Ҷумҳурии Тоҷикистон «Дар бораи таҳсилоти олии касбии муассисаҳои олии таълимӣ» ва банди 4 Низомномаи намунавӣ оид ба муассисаи таълимии таҳсилоти олии касбии Ҷумҳурии Тоҷикистон, бо Қарори Шӯрои Олимони Донишкадаи молия ва иқтисоди Тоҷикистон таҳти № 11/15, аз 26 майи соли 2014 сохтори Донишкадаи молия ва иқтисоди Тоҷикистон дар ҳайати факултети ҳисобдорӣ ва омор кафедраи аудит ва ревизия таъсис дода шуд ва дар ин замина мувофиқи фармоиши ректори Донишкадаи молия ва иқтисоди Тоҷикистон, таҳти № 114/И, аз 08 июли соли 2014 кафедраи аудит ва ревизия ҳамчун кафедраи тахассусӣ таъсис дода шуд. Мудири кафедраи аудит ва ревизия номзади илмҳои иқтисодӣ, дотсент Орзуев Парвиз Ҷамолиддинович интихоб гардид. Аз 01-уми феврали соли 2019 роҳбарии кафедраро номзади илмҳои иқтисодӣ, дотсент Садриддинов Манучеҳр Исломиддинович ба уҳда дошт. Инчунин аз моҳи июни соли 2020 то моҳи апрели 2025 н.и.и., дотсент Тилабов Ёрибек Эмомназарович дар вазифаи мудири кафедраи мазкур интихоб гардид. Ва аз 2-юми марти соли 2025 н.и.и., дотсент Баротов Амирхон Холмирзоевич кафедраи мазкуро роҳбарӣ мекунад.

Донишкадаи молия ва иқтисоди Тоҷикистон бо Қарори Ҳукумати Ҷумҳурии Тоҷикистон аз 27 марти соли 2018, таҳти №169 мақоми худро иваз намуд ва он ба Донишгоҳи давлатии молия ва иқтисоди Тоҷикистон табдил дода шуд, ки кафедраи аудит ва ревизия бо ҳамин ном дар зерсохтори факултети ҳисобдорӣ ва омор нигоҳ дошта шуд.

Ҳайати кормандону омӯзгорони кафедра аз 10 нафар иборат мебошанд, ки аз онҳо: 5 нафарашон - номзади илмҳои иқтисодӣ, дотсент, 1 нафар- муаллими калон, 3 нафарашон -ассистент ва 1 нафар - оператор-ҳуҷҷатнигор мебошанд. Инчунин дар соли ҷорӣ 2 нафар ба ҳайси ҳамкори дохилӣ ва 1 нафар - ба ҳайси ҳамкори беруна дар кафедра фаъолият менамоянд.

Кафедраи аудит ва ревизия яке аз муҳимтарин ҷузъи таълимию илмии сохтори Донишгоҳи давлатии молия ва иқтисоди Тоҷикистон (ДДМИТ) ба шумор рафта, аз аввали таъсисёбиаш фаъолияти таълимию илмӣ ва методию  тарбиявии донишҷӯёнро тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон, санадҳои меъёрию ҳуқуқии Вазорати маориф ва илми Ҷумҳурии Тоҷикистон, Вазорати молияи Ҷумҳурии Тоҷикистон, Оинномаи ДДМИТ ва дастуру супоришҳои роҳбарияти донишгоҳ ба роҳ монда, таълиму тарбияро дар асоси стандартҳои давлатии таҳсилот ва нақшаҳои таълимии тасдиқшуда амалӣ намуда, дар тайёр кардани мутахассисони баландихтисос саҳми арзанда мегузорад.

Кафедра яке аз кафедраҳои бонуфузи донишгоҳ ба ҳисоб рафта, мутахассисони соҳаҳои зеринро омода менамояд:

Фаъолияти кафедраи аудит ва ревизия айни замон аз руйи ду ихтисос:  1-25011100-“Аудит ва ревизия” ва 1-25010819- “Баҳисобгирии молиявӣ ва назорат дар мақомоти ҳифзи ҳуқуқ” дар зинаҳои бакалавариат (рӯзона, фосилавӣ) ва магистратура ба роҳ монда шудааст.

Ихтисоси 1-25011100-Аудит ва ревизия, мутахассисонро дар самти аудити дохилӣ ва беруна, таҳлили молиявию иқтисодии фаъолияти ташкилотҳо, баҳисобгирии андоз ва ҳисоботдиҳӣ, банақшагирӣ ва назорати молиявӣ, назорати риояи қонунгузории молиявӣ ва андозӣ тайёр мекунад. Хатмкунандагони ихтисоси "Аудит ва ревизия" метавонанд вазифаҳои гуногунро шуруъ аз муҳосиб то сармуҳосиб, иқтисодчӣ, таҳлилгари молиявӣ, аудитор, мутахассиси андоз ва ҳисоботдиҳӣ то роҳбарии сатҳи олӣ дар ташкилотҳои хусусӣ ва давлатиро ишғол кунанд. Онҳо метавонанд дар ширкатҳои аудиторию машваратӣ, муассисаю корхонаҳои бахши давлатӣ, ташкилотҳои қарзӣ, корхонаҳои тиҷоратию истеҳсолӣ, корхонаҳои саноатӣ ва муассисаҳои молиявӣ кору фаъолият намоянд.

1-25010819- Баҳисобгирии молиявӣ ва назорат дар мақомоти ҳифзи ҳуқуқ, мутахассисонро дар самти таҳсилоти иқтисодӣ, таҳсилоти иқтисодии бо донишҳои ҳуқуқӣ асосёфта, андозбандӣ, молия ва идоракунии буҳрон омода менамояд. Хатмкунандагони ихтисоси мазкур метавонанд дар пешбурди фаъолияти иқтисодӣ ва молиявии ташкилотҳо ва корхонаҳои  ҳама намуди моликият ба кор машғул гарданд. Хатмкунандагони ихтисоси " Баҳисобгирии молиявӣ ва назорат дар мақомоти ҳифзи ҳуқуқ " имконият доранд дар вазифаҳои мушовирони баҳисобгирӣ ва андоз, аудити молиявӣ ё давлатӣ, фаъолиятҳои назоратӣ ва аудит, директори молиявӣ, сармуҳосиб, кормандони хадамоти молиявӣ, банақшагирию иқтисодӣ, хизматрасониҳои марбут ба ҳисобдорию назорат, инчунин дар шӯъбаҳои амнияти иқтисодии ташкилотҳо новобаста аз шаклҳои ташкилӣ – ҳуқуқӣ (ташкилотҳои тиҷоратӣ ва ғайритиҷоратӣ, муассисаҳои бонкӣ ва қарзӣ, сохторҳои давлатӣ ва маҳаллӣ) кору фаъолият дошта бошанд.

Кафедраи мазкур тахассусӣ буда, соли 2015 нахустин донишҷӯёнро аз рӯйи ихтисоси 1-25011100- “аудит ва ревизия” қабул намудааст ва соли таҳсили 2018-2019 бори аввал кафедраро донишҷӯён дар зинаи бакалавриат аз рӯи ихтисоси аудит ва ревизия хатм намудаанд. Ҳамчунин устодони кафедра ба донишҷӯён аз рӯйи зиёда аз 22  фанни таълимӣ дарс мегӯянд. Яке аз мақсадҳои ниҳоии устодони кафедра ин таъмини донишҷӯён бо маводҳои таълимӣ мебошад. Инчунин оид ба фанҳои таълимии кафедра маҷмӯаи барномаҳои таълимӣ, барномаҳои корӣ (силлабусҳо) барои бахшҳои низоми таҳсилоти кредитӣ, тестҳо барои қабули имтиҳоноти фосилавию имтиҳоноти ҷамъбастӣ, мавзуҳои лексионӣ дар шакли слайд, мавзуҳои корҳои курсӣ, рисолаҳои хатм ва рисолаҳои магистрӣ, барномаи таҷрибаомӯзӣ, нақшаи дурнамои корҳои илмию амалии устодони кафедра дар намуди чопӣ ва электронӣ аз тарафи ҳайати дотсентон ва устодони кафедра тайёр карда шудаанд.

Дар кафедраи аудит ва ревизия гузаронидани мизҳои мудаввар низ анъана шудааст. Одатан, дар ин сӯҳбатҳои илмӣ оид ба мавзуъҳои мубрами рӯз олимони шинохта ва мутахассисони соҳа аз мақомотҳои олии назоратӣ бо маърӯзаҳои илмӣ баромад мекунанд.

Дар солҳои 2014-2019 дар ташкил ва рушди кафедра олимон ва устодони зерин саҳмгузор ва фаъолият намудаанд: профессор Уроқов Дустмурод Уроқович, дотсентон Исматов Асадулло Ҳурматович, Орзуев Парвизҷон Ҷамолиддинович, Алиев Олимҷон Маҳмудович, Садриддинов Мануҷеҳр Исломиддинович, Бобиев Исмоил Атоевич, Хушвахтзода Қобилҷон Хушвахт, Зиёев Сулаймон Саъдуллоевич, Расулов Туйғун Мирқозиевич, Тоҳирова Раҷабмоҳ Сафарович, Шоймардонов Сафаралӣ Қурбоналиевич, муаллимони калон -Аҳмадҷонова Санобар Юсупҷановна, Ҷабборова Парвина Ҷумаевна, Маҳмадов Маҳмадраҷаб Ганҷалович, Юнусов Абдуқаюм Қамарович, Ҳакимов Зоирҷон Рузибекович, Досиев Маҳмадшоҳ Назарович, ва ассистентон - Саидов Раҷабалӣ Назифович, Сафаров Сангак Ҳамидуллоевич, Раҳмонов Абубакр Аскаралиевич, Мирзозода Дилрабо, Абдуллоева Шаҳноза Файзилаҳматовна.

Кафедра бо Вазорату идораҳои мамлакат, ба монанди Вазорати молияи Ҷумҳурии Тоҷикистон, Палатаи Ҳисоби ҶТ, КВД «Тоҷиксуғурта», ширкати аудитории ҶДММ «Шарқ-аудит» ва як қатор муассисаҳои илмию тадқиқотӣ ва муассисаҳои олии таълимии ҷумҳурӣ, аз ҷумла бо кафедраҳои баҳисобгирии муҳосибӣ, таҳлили иқтисодӣ ва аудити Донишгоҳи миллии Тоҷикистон, кафедраи баҳисобгирии муҳосибӣ, таҳлил, ва аудити Донишгоҳи байналмилалии сайёҳӣ ва соҳибкории Тоҷикистон  робитаи зичи ҳамкорӣ дорад.

Кафедра бо васоити техникӣ пурра таъмин буда, дорои ду адад компютери пайваст бо хатти интернет ва ду адад принтер мебошад, ки устодон аз онҳо ба таври васеъ истифода мебаранд.

Инчунин кафедра дар тайёр кардани мутахассисон, устодони пуртаҷриба барои дарёфти дараҷаи илмӣ саҳми арзанда дорад, ки ҳоло дар кафедра чор нафар унвонҷӯён: Абдулхайров Фахриддин Маҳмадшоевич, Каримов Нурулло Сафарбегович, Саёраева Рухшона Шайховна, Шаҳнозаи Садриддин бо кори илмӣ машғул мебошанд, ки рисолаҳои номзадии устодони номбурда омода шудаанд ва дар арафаи ҳимоя қарор доранд.

Самти корҳои илмию таҳқиқотии кафедра аз соли 2023 то соли 2027 дар мавзӯи «Ҷанбаҳои назариявӣ ва методологии рушди бозори хизматрасонии аудиторӣ дар Ҷумҳурии Тоҷикистон» ва масоили «Ҷиҳатҳои назариявию методологӣ ва асосҳои ниҳодии рушди фаъолияти аудиторӣ дар Ҷумҳурии Тоҷикистон» тасдиқ гардидааст, ки устодони кафедра аз рӯи марҳилаҳои он ҳамасола корҳои илмию тадқиқотиро ба роҳ мемонанд. Кафедра дар тӯли фаъолияти худ ҳамасола конфронсҳо, мизҳои мудаввар, маҳфилҳои илмӣ ва семенари илмию амалӣ мегузаронад. Мунтазам аз тарафи устодони кафедра дарсҳои кушод гузаронида мешаванд, ки онҳо дар ҷаласаҳои кафедра мавриди муҳокима қарор мегиранд. Устодони кафедра дар тамоми чорабиниҳои сиёсии сатҳи ҷумҳуриявӣ ва тарбиявию умумидонишгоҳӣ фаъолона иштирок менамоянд.