Варзиш яке аз воситаҳои муҳимми тарбияи ҷисмонӣ, маънавӣ ва ахлоқии ҷавонон ба ҳисоб рафта, дар ташаккули иродаи қавӣ, матонат, интизом, масъулиятшиносӣ ва ҳисси ватандӯстӣ нақши муассир дорад. Махсусан, намудҳои гӯштин, ки аз варзишгар омодагии баланди ҷисмонӣ, маҳорати техникӣ ва ҷасоратро талаб менамоянд, дар фарҳанги варзишии мардуми тоҷик ҷойгоҳи хосса доранд.

Дар ин замина, дастовардҳои варзишгарони ҷавоне, ки дар баробари таҳсил ба варзиши касбӣ машғул буда, дар мусобиқаҳои байналмилалӣ шарафи давлату миллат ва муассисаи таълимии худро ҳимоя мекунанд, қобили таваҷҷуҳ ва қадрдонӣ мебошанд.

Мубориз Баротзода - донишҷӯи соли аввали ихтисоси 1960101-и факултети фаъолияти гумрукӣ ва амнияти иқтисодии Донишгоҳи давлатии молия ва иқтисоди Тоҷикистон бо дастовардҳои назаррас дар риштаҳои гӯштин, аз ҷумла кураш, самбо ва ҷудо дар роҳи муаррифии варзиши миллӣ қадамҳои устувор мегузорад. Мубориз ҳамчун варзишгари ҷавон дар мусобиқаҳои байналмилалии гӯштин иштирок намуда, бо нишон додани маҳорати баланди варзишӣ ба натиҷаҳои назаррас ноил гардидааст.

Мубориз Баротзода аз ҷумлаи ҷавононест, ки варзишро ҳамчун мактаби тарбия, иродасозӣ ва худшиносӣ интихоб намудааст. Машғул шудан ба намудҳои гуногуни гӯштин, аз ҷумла кураш, самбо ва ҷудо аз варзишгар омодагии ҳамаҷониба, тамринҳои мунтазам, маҳорати техникӣ ва қобилияти мутобиқ шудан ба талаботи ҳар як намуди рақобатро тақозо менамояд.

Ҳар як намуди гӯштин хусусият ва қоидаҳои махсуси худро дорад. Ҷудо бештар ба истифодаи усулҳои партофтан, нигоҳ доштан ва аз тавозун баровардани ҳариф асос ёфта, самбо маҳорати техникии гӯштин ва истифодаи усулҳои гуногуни муборизаро талаб мекунад. Кураш бошад, бо хусусиятҳои хоси рақобат дар ҳолати рост ва истифодаи усулҳои партофтан фарқ мекунад.

Таҷрибаи иштирок дар чунин мусобиқаҳо ба варзишгар имкон медиҳад, ки маҳорати худро такмил дода, дар рақобат бо паҳлавонони дигар кишварҳо таҷрибаи арзишманд андӯзад.

Яке аз муҳимтарин дастовардҳои Мубориз Баротзода иштироки муваффақонаи ӯ дар Чемпионати ҷаҳон оид ба кураш мебошад. Аз 21 то 24 августи соли 2026 дар шаҳри Бокуи Ҷумҳурии Озарбойҷон Чемпионати ҷаҳон оид ба гӯштини қазоқӣ - кураш таҳти сарпарастии Федератсияи ҷаҳонии гӯштин (UWW) доир гардид. Дар ин мусобиқа намояндагони кишварҳои гуногуни ҷаҳон барои ба даст овардани унвони қаҳрамонӣ ва медалҳои чемпионат рақобат намуданд. Ҳайати мунтахаби Тоҷикистонро ҳафт варзишгар намояндагӣ мекарданд. Мубориз Баротзода дар вазни то 55 килограмм ба майдони рақобат баромад.

Варзишгари ҷавони тоҷик бо нишон додани маҳорати хуби техникӣ ва иродаи қавӣ тавонист то марҳилаи ниҳоии мусобиқа роҳ ёбад. Ӯ дар рақобати ҳалкунанда иштирок намуда, дар натиҷаи ҳунарнамоӣ мақоми дуюмро ишғол кард ва соҳиби медали нуқраи Чемпионати ҷаҳон гардид.

Ин дастовард барои варзишгари ҷавон ва ҷомеаи донишҷӯёни ДДМИТ аҳамияти хосса дошта, дар муаррифии имкониятҳои варзишии ҷавонони тоҷик дар арсаи байналмилалӣ саҳми арзанда мегузорад.

Бояд зикр намуд, ки дар ин Чемпионати ҷаҳон мунтахаби Тоҷикистон дар маҷмуъ панҷ медал - ду тилло ва се нуқра ба даст овард. Мубориз Баротзода яке аз се барандаи медали нуқраи ҳайати Тоҷикистон буд.

Дастоварди дигари назарраси Мубориз Баротзода дар мусобиқаи кушоди байналмилалӣ оид ба кураш, ки бахшида ба ҷашни Истиқлоли давлатии Ҷумҳурии Тоҷикистон дар Қасри тенниси шаҳри Душанбе баргузор гардид, ба қайд гирифта шуд.

Дар ин мусобиқа намояндагони шаш кишвари Осиёи Марказӣ иштирок намуда, барои ба даст овардани ҷойҳои ифтихорӣ рақобат карданд.

Мубориз Баротзода бо нишон додани маҳорати баланди варзишӣ ва омодагии хуби ҷисмонӣ тавонист рақибони худро мағлуб намуда, мақоми аввалро соҳиб гардад.

Барои ин дастоварди арзанда ба ӯ медал ва диплом супорида шуд. Ҳамчунин, бо мақсади қадрдонии маҳорати варзишӣ ва натиҷаи назарраси бадастовардааш, аз ҷониби раиси Федератсияи самбои ҷумҳурӣ Ҷомӣ Ҳасан қадрдонӣ гардид.

Ин ғолибият бори дигар нишон дод, ки варзишгари ҷавон барои иштирок дар мусобиқаҳои сатҳи байналмилалӣ ва ба даст овардани натиҷаҳои баланд имконияту қобилияти зарурӣ дорад.

Мубориз Баротзода 2 августи соли 2026 дар шаҳри Бокуи Ҷумҳурии Озарбойҷон низ дар мусобиқаи байналмилалӣ иштирок намуда, дар байни намояндагони 70 давлат мақоми дуюмро соҳиб гардидааст.

Ин натиҷа низ яке аз марҳилаҳои муҳимми фаъолияти варзишии ӯ ба шумор рафта, аз таҷрибаи андӯхта ва талошҳои пайвастаи варзишгар барои расидан ба ҳадафҳои баланд шаҳодат медиҳад.

Ҷанбаи дигари қобили таваҷҷуҳи фаъолияти Мубориз Баротзода таҳсили ӯ дар факултети фаъолияти гумрукӣ ва амнияти иқтисодии Донишгоҳи давлатии молия ва иқтисоди Тоҷикистон мебошад.

Ӯ донишҷӯи курси якуми ихтисоси 1960101 буда, дар баробари фаъолияти варзишӣ барои аз худ намудани донишҳои назариявӣ ва соҳавӣ низ кӯшиш менамояд.

Факултети фаъолияти гумрукӣ ва амнияти иқтисодӣ яке аз самтҳои муҳими омодасозии мутахассисони соҳаи иқтисод, фаъолияти гумрукӣ ва амнияти иқтисодӣ ба шумор меравад. Таҳсил дар ин самт барои донишҷӯён имкон фароҳам меорад, ки донишҳои зарурии касбиро аз худ намуда, дар оянда ҳамчун мутахассисони соҳибмаърифат ва масъулиятшинос фаъолият намоянд.

Албатта, ҳамзамон пеш бурдани таҳсил ва варзиши касбӣ кори осон нест. Машғулиятҳои таълимӣ, омодагӣ ба имтиҳонҳо ва тамринҳои ҳаррӯза аз донишҷӯ банақшагирии дурусти вақт, интизом ва масъулияти баландро талаб мекунанд. Фаъолияти Мубориз Баротзода дар ин ду самт метавонад намунаи талоши ҷавонон барои расидан ба ҳадафҳои таълимӣ ва варзишӣ бошад.

Мубориз Баротзода дар маҷмуъ дар соли 2026 7 муваффақият дорад, яъне аз ҷумлаи ҷавонони фаъоли Донишгоҳи давлатии молия ва иқтисоди Тоҷикистон мебошад, ки дар баробари таҳсил ба рушди варзиш низ саҳм мегузорад.

Бовар дорем, ки ин варзишгари ҷавон бо идомаи тамринҳои мунтазам, такмили маҳорати касбӣ ва таваҷҷуҳи ҷиддӣ ба таҳсил дар оянда низ ба дастовардҳои нав ноил гардида, шарафи донишгоҳ ва Тоҷикистонро дар мусобиқаҳои ҷумҳуриявию байналмилалӣ ҳимоя хоҳад кард.

Ба Мубориз Баротзода дар роҳи илму дониш, варзиш ва расидан ба қуллаҳои баланди муваффақият барору комёбиҳо таманно дорем!

 

Наврӯз ҶОБИРЗОДА