ПАРЧАМИ МИЛЛӢ - ТАҶАССУМГАРИ ҲАСТИИ МИЛЛАТ, ШУКӮҲИ ИСТИҚЛОЛ ВА АСОЛАТИ ДАВЛАТДОРИИ ТОҶИКОН
Парчам дар таърихи ҳар як миллат на танҳо рамзи шинохти давлат, балки таҷассумгари ормонҳои миллӣ, хотираи таърихӣ, ифтихори ватандорӣ ва нишонаи соҳибихтиёрии он ба ҳисоб меравад. Барои миллати куҳанбунёди тоҷик Парчами давлатӣ аз ҷумлаи муқаддасоти миллӣ, рамзи ҳастии давлат, ифодагари ҳувияти миллӣ ва пайванди ногусастании гузашта бо имрӯз ва ояндаи дурахшон мебошад. Он дар фазои Тоҷикистони соҳибистиқлол парафшон гардида, аз иродаи қавии миллат барои ҳифзи озодӣ, таҳкими давлатдорӣ ва бунёди ҷомеаи пешрафта шаҳодат медиҳад.
Таърихи парчамдории тоҷикон бо таърихи ташаккул ва таҳаввули давлатдории ниёгони мо робитаи ногусастанӣ дорад. Парчам аз замонҳои қадим ҳамчун нишонаи қудрат, соҳибдавлатӣ, муттаҳидӣ ва ҳимояи марзу буми аҷдодӣ мавқеи муҳим доштааст. Ниёгони тоҷикон дар марҳалаҳои гуногуни таърихӣ тавассути парчамҳои худ ҳувият, шукуҳ ва иқтидори давлатдории хешро муаррифӣ намудаанд.
Дар ин замина, Парчами давлатии Ҷумҳурии Тоҷикистон идомаи мантиқии суннатҳои давлатдории миллӣ ва таҷассумгари ормонҳои таърихии халқи тоҷик мебошад. Он на танҳо рамзи соҳибихтиёрии давлати муосири тоҷикон, балки нишонаи эҳёи арзишҳои миллӣ, худшиносии таърихӣ ва арҷгузорӣ ба мероси пурғановати ниёгон аст.
Бо ба даст овардани Истиқлоли давлатӣ дар соли 1991 марҳалаи нави таърихи давлатдории тоҷикон оғоз гардид. Дар ин раванд зарурати муайян намудани рамзҳои давлатӣ, ки моҳияти истиқлолият ва соҳибихтиёрии кишварро таҷассум намоянд, ба миён омад. Маҳз 24 ноябри соли 1992 дар Иҷлосияи XVI Шӯрои Олии Ҷумҳурии Тоҷикистон Парчами давлатии Ҷумҳурии Тоҷикистон қабул гардид. Ин рӯйдоди муҳими таърихӣ дар таҳкими пояҳои давлатдории миллӣ ва ташаккули рамзҳои давлати соҳибистиқлол нақши муассир гузошт. Аз ҳамон рӯз Парчами давлатӣ ба рамзи умед ба ояндаи осоишта, иродаи сиёсӣ, муттаҳидии миллат ва азми устувори мардуми Тоҷикистон барои ҳифзи истиқлолу озодӣ табдил ёфт.
Парчами давлатии Ҷумҳурии Тоҷикистон аз се рахи уфуқӣ — сурх, сафед ва сабз иборат буда, дар маркази он тоҷ ва ҳафт ситора ҷой гирифтаанд. Ҳар як унсури он дорои мазмуну муҳтавои рамзӣ буда, бо арзишҳои таърихӣ, фарҳангӣ ва маънавии миллати тоҷик пайванди амиқ дорад. Рангҳо ва рамзҳои дар Парчам таҷассумёфта ифодагари таъриху фарҳанг, ормонҳои миллӣ ва саъю талоши мардуми Тоҷикистон барои зиндагии осоишта ва ояндаи обод мебошанд.
Дар шароити муосир Парчами давлатӣ яке аз муҳимтарин нишонаҳои шинохти байналмилалии ҳар як кишвар ба шумор меравад. Маҳз тавассути рамзҳои давлатӣ ҳар миллат дар арсаи ҷаҳонӣ ҳамчун воҳиди мустақили сиёсиву ҳуқуқӣ муаррифӣ мегардад.
Парчами Тоҷикистон дар чорабиниҳои байналмилалӣ, ҳамоишҳои сиёсиву фарҳангӣ, мусобиқаҳои варзишӣ ва дигар рӯйдодҳои муҳими ҷаҳонӣ парафшон гардида, аз мавҷудияти давлати соҳибистиқлол ва мақому ҷойгоҳи он дар ҷомеаи ҷаҳонӣ шаҳодат медиҳад. Ҳар боре ки Парчами Тоҷикистон дар арсаи байналмилалӣ баланд бардошта мешавад, эҳсоси ифтихору сарбаландӣ ва муҳаббати шаҳрвандон ба Ватани азиз боз ҳам қавитар мегардад.
Дар дохили кишвар низ Парчами давлатӣ ҳамчун рамзи ваҳдату ҳамбастагӣ ва сарҷамъии миллат аҳаммияти бузург дорад. Он новобаста аз касбу кор, мақоми иҷтимоӣ, маҳалли зист ва ҷаҳонбинии шаҳрвандон, ҳамаро дар атрофи як арзиши умумӣ — Тоҷикистони соҳибистиқлол муттаҳид месозад.
Беҳуда нест, ки ҳамасола 24 ноябр дар Ҷумҳурии Тоҷикистон Рӯзи Парчами давлатӣ таҷлил мегардад. Ин сана на танҳо рӯзи гиромидошти яке аз муқаддасоти миллӣ, балки фурсатест барои арҷгузорӣ ба таърихи давлатдорӣ, бознигарии масъулияти шаҳрвандӣ ва таҳкими эҳсоси ватандӯстиву худшиносии миллӣ.
Дар раванди ташаккули ҷомеаи муосир, бахусус дар шароити ҷаҳонишавӣ, масъалаи ҳифзи арзишҳои миллӣ, баланд бардоштани сатҳи худшиносӣ ва тарбияи насли ҷавон дар рӯҳияи ватандӯстӣ аҳаммияти махсус касб мекунад. Дар ин раванд Парчами давлатӣ ҳамчун рамзи муқаддаси миллӣ ва омили муҳими тарбияи шаҳрвандӣ нақши муассир дорад. Эҳтиром ба он бояд дар қалби ҳар як шаҳрванди кишвар ҳамчун нишонаи муҳаббат ба Ватан, садоқат ба давлат ва арҷгузорӣ ба таъриху фарҳанги миллӣ ҷойгоҳи хос дошта бошад.
Имрӯз Парчами давлатии Ҷумҳурии Тоҷикистон дар тамоми гӯшаву канори мамлакат парафшон буда, рамзи ваҳдат, сулҳу субот, созандагӣ ва пешрафти кишвар мебошад. Баландтарин Парчами давлатии Тоҷикистон, ки дар шаҳри Душанбе ҷойгир аст, низ яке аз рамзҳои барҷастаи арҷгузорӣ ба муқаддасоти миллӣ ва ифтихори шаҳрвандӣ ба шумор меравад.
Парафшонии Парчами давлатӣ дар фазои кишвар ҳар яки моро ба ҳифзи дастовардҳои истиқлолият, таҳкими ваҳдати миллӣ, рушди илму маориф, иқтисодиёт ва фарҳанг ҳидоят менамояд. Он рамзи масъулияти насли имрӯз дар назди таърих ва наслҳои оянда буда, моро водор месозад, ки барои ободии Ватан ва таҳкими пояҳои давлатдории миллӣ саҳми арзандаи худро гузорем.
Парчами миллӣ барои миллати тоҷик танҳо як рамзи давлатӣ нест. Он таҷассумгари таърихи пурифтихор, ормонҳои ҳазорсолаи миллат, шуҷоату матонати ниёгон, дастоварди истиқлолият ва умед ба ояндаи дурахшон мебошад. Дар ҳар рахи он паёми таърих, дар тоҷи он нишони давлатдорӣ ва дар ҳафт ситораи он рамзи ормонҳои созанда ва саодати миллат таҷассум ёфтааст.
Эҳтиром ба Парчами давлатӣ эҳтиром ба Ватан, таърих, забон, фарҳанг ва ҳувияти миллии хеш аст. Аз ин рӯ, ҳар як шаҳрванди Тоҷикистонро зарур аст, ки ин муқаддасоти миллиро гиромӣ дошта, бо рафтору кирдори шоиста, меҳнати содиқона ва фаъолияти созандаи худ дар таҳкими пояҳои давлатдорӣ, ҳифзи истиқлолият ва ободии Ватани азиз саҳм гузорад.
Ҳикматулло ШАМСИДДИНЗОДА,
ассистенти кафедраи низоми иттилоотӣ-инноватсионӣ дар иқтисодиёти ДДМИТ
Тоҷ
Рус
Eng