Хабарҳо

Ҳамоиши илмӣ доир ба муаммоҳои моделсозии макроиқтисодӣ

Рӯзи 26 феврали соли равон бо ташаббуси Раёсати илм ва инноватсия ва кафедраи система ва технологияҳои иттилоотӣ дар иқтисодиёт ДМИТ конференсияи илмӣ-амалии донишкадавӣ дар мавзӯи «Проблемаҳои актуалии моделсозии макроиқтисодӣ ва дурнамои истифодабарии технологияҳои иттилоотӣ» доир гардид.
Зимни кушодашавии ҳамоиш муовини ректор оид ба илм Ғиёсиддин Ашуров иброз дошт, ки бо назардошти муҳиммияти мавзӯи баррасишаванда моро зарур аст, ки муаммоҳои актуалии дар сатҳи макроиқтисодӣ мавҷудбударо бо истифодаи моделҳои макроиқтисодӣ ва технологияҳои иттилоотӣ бартараф намуда, дар рушди иқтисодиёти ҷумҳурӣ саҳм дошта бошем.
Сипас, маърузаҳои пурмазмуни Мақсудҷон Собиров, н.и.ф.м., дотсент, ходими пешбари илмии Пажӯҳишгоҳи иқтисодиёт ва демографияи АИҶТ дар мавзӯи «Оиди як модели иқтисодӣ-математикӣ», Фахриддин Мирзоахмедов, д.и.и., профессори ДМИТ дар мавзӯи «Усули итератсионии таҳлили мувозинатии байнисоҳавии Леонтев» ва Манзура Кошонова, д.и.и., профессор, директори Пажӯҳишгоҳи илмӣ-тадқиқотии назди ДМИТ дар мавзӯи «Технологияи информатсионӣ ва пешрафти сармояи инсонӣ дар ҷабҳаи рушди иқтисодӣ» шунида шуд.

Гуфта шуд, ки дар замони муосир истифодаи технологияҳои муосири иттилоотӣ имкон медиҳанд, ки натиҷаҳои таҳқиқот воқеиятро нишон диҳад. Бинобар ин шарҳи дурусти воқеаҳои иқтисодӣ дар шароити Тоҷикистон барои дуруст ба роҳ мондани банақшагирӣ ва идоранамоии он мусоидат хоҳад кард.
Конфронс дар ду бахш: моделсозии математикию иқтисодӣ ва технологияҳои иттилоотӣ дар иқтисодиёт идома ёфта, дар он масъалаҳои алоқамандии технологияҳои иттилоотӣ ва сармояи инсонӣ, методологияи таҳияи модели макроиқтисодӣ дар бахши саноат-ҳамчун танзими давлатии иқтисодиёти ҶТ, таҳлили эконометрикии соҳаи энергетика, таъсири модели иқтисодию математикии шарикии давлатию хусусӣ ба афзоиши ММД мавриди таҳлилу баррасӣ қарор гирифта шуд. 

Машҳура Абдуллоева