Хабарҳо

Маҳфили шеъру адаб

Ба ифтихори фарорасии Наврӯзи оламафрӯз бо ибтикори кафедраи забонҳои тоҷикӣ ва русии донишкада маҳфили шеъру адаб бо иштироки Шоири халқии Тоҷикистон Гулназар ва шоирон Раънои Мубориз ва Алиакбар Сафаров баргузор шуд.
Дар он донишҷӯён аз эҷодиёти ин устодони сухан намунаҳо қироат карда, аз ҷашнгирии Наврӯз ва эҳёи чанд унсури наврӯзӣ, ба монанди чоршанбеи сурӣ саҳначаҳо намоиш доданд.
Чанд нафар донишҷӯёни навқалам – Нозанини Сорбон, Беҳрӯз Ҳасанов ва Фарзона Мирганова, ки шогирдони Ҷумъа Махшул, шоир ва устоди кафедраи забонҳои тоҷикӣ ва русӣ мебошанд, аз эҷодиёти худ шеърҳо хонданд ва аз тарафи устодони шеър баҳои сазовор гирифтанд.
Баъдан меҳмонон аз чакидаи хомаи хеш намунае чанд қироат карда, ба базми наврӯзӣ шукӯҳи хоса ворид сохтанд ва бо ин аҳли нишастро ба ваҷд оварданд.
Дар охир, ба суолҳои донишҷӯён дар бораи ҳамоиши байналмилалии адибони кишварҳои ҳавзаи Наврӯз, ҷаҳонишавии Наврӯз, эҳёи суннатҳои наврӯзӣ ва дар бораи эҷодиёташон посухҳои мушаххас доданд.

Машҳура Абдуллоева