Хабарҳо

Арзи эҳтиром

Рӯзи 23 январи соли равон бо фармони Президенти Ҷумҳурии Тоҷикистон Солеҳзода Ашурбой Абдувоҳид аз вазифаи ректори Донишкадаи молия ва иқтисоди Тоҷикистон озод ва ба вазифаи Ёрдамчии Президенти Ҷумҳурии Тоҷикистон оид ба масъалаҳои иқтисодӣ таъйин гардид.
Дар ҷамъомади аҳли меҳнати донишкада, ки рӯзи 24 январи соли 2017 доир гардид, Солеҳзода А.А. бо ҳайати профессорону устодон, кормандон ва донишҷӯён вохӯрда, гуфт, ки дарвоқеъ, ДМИТ таъминкунандаи кадрҳои иқтисодист ва мутахассисони омоданамудаи он бояд соҳибмаърифату болаёқат ва кордон бошанд. Афзуд, ки ҳамаи бандҳои Стратегияи рушди Донишкадаи молия ва иқтисоди Тоҷикистон давра ба давра амалӣ гардида истодааст. 

Донишкадаи молия ва иқтисод даргоҳи муқаддас аст, зеро дар ин макон шахс аз нуқтаи назари зеҳнӣ ва рӯҳию равонӣ камолот ва ташаккул меёбад. Коллективи меҳнатӣ бояд устувор бошад, ҳар нафаре, ки дар ин ҷо кор ва таҳсил мекунад, бояд ба Ватан ва ба кор содиқ бошад, зеро он як порчаи Ватан аст. Мароми ҳар як корманду омӯзгор ин обод кардани донишкада ва баланд бардоштани мақоми он дар арсаи байналмилалӣ, баланд бардоштани сифати таълиму тарбия бояд бошад. Ҳамаи он дастовардҳое, ки дар солҳои охир ба даст овардем, подоши заҳматҳои аҳли коллективи меҳнатӣ аст ва ман фахр мекунам, ки бо шумо якҷоя кор кардам, гуфт Солеҳзода А.А. 
Дар охир ба аҳли меҳнати донишкада барои амалишавии ниятҳои ба нақшагирифташуда ба фаъолияти пурсамар ҳидоят кард ва дар ин ҷода барору комёбӣ хост.
Баъдан Шукрулло Хайров, муовини ректор оид ба таълим баромад карда, дар бораи заҳмату талош ва хизматҳои шоёни Солеҳзода А.А. дар рушди самти таълиму тарбия, илм ва корҳои ободонӣ дар донишкада ёдовар шуда, афзуд, ки дар давраи фаъолияти мавсуф ҳамчун роҳбари таълимгоҳ пешравиҳо хеле зиёд шуд ва эътибори донишкада дар арсаи байналмилалӣ боло рафта, он соҳиби ҷоизаҳо, аз ҷумла бо ду ҷоизаи байналмилалӣ: «Тоҷ барои сифат» ва BIZZ-2015 сазовор гардид.
Профессорони донишкада Дилбар Қандиёрова ва Шавкат Исмоилов низ бо меҳру самимият дар бораи садоқат, дониш, малака, ҷаҳонбиниву кордонии ин шахсияти шинохта ва донишманди соҳаи иқтисодиёт сухане чанд гуфта, барояш дар фаъолияти минбаъда муваффақиятҳои тоза таманно карданд.
Месазад гуфт, ки Солеҳзода А. чун роҳбари ғамхору ояндабин тавонист дар даврони роҳбариаш аҳли меҳнатро тифоқу пешрав ва мақоми ДМИТ-ро баланд бардорад. 

Машҳура Абдуллоева