Хабарҳо

Донишҷӯёни хобгоҳ модаронро табрик карданд

Рӯзи 4 марти соли равон бо ташаббуси донишҷӯёни хобгоҳи №1 бахшида ба Рӯзи Модар чорабинии фарҳангӣ таҳти унвони «Модар беҳтарин ганҷинаи дунёст» баргузор гардид.
Сараввал Ҷовидон Халифаев, роҳбари маҳфили илмӣ-назариявии «Иқтисоддони беҳтарин» бонувон ва духтарони донишкадаро бо Рӯзи Модар муборакбод намуда, барояшон тансиҳативу хонаободӣ таманно кард.
Дар чорабинӣ донишҷӯён – истиқоматкунандагони хобгоҳ - Амирҳамза Раҳимов, Абубакр Саидов, Толибҷон Зарифзода дар васфи модар бо маҳорати баланд суруд хонданд.
Ҳамчунин гурӯҳи донишҷӯён муҳаббату эҳтироми хешро нисбат ба модар бо қироати шеър ифода карданд.
Чанд таронаи таъсирбахш дар бораи эҳтироми модар ва саҳначаи тарбиявию ҳаҷвӣ ба маҳфил ҳусни дигар зам карда, хеле ҷолибу хотирмон иҷро гардид ва аҳамияти тарбиявӣ дошт.

Машҳура Абдуллоева